Suður-Súdan
Lokaverkefni | 10.bekkur | Breiðholtsskóli
Menning
Flestir íbúar Suður-Súdan tilheyra afrískum þjóðflokkum.
Stærstu flokkarnir eru Dinka, sem er 2/5 af íbúunum, og Nuer,
sem er 1/5 af íbúunum. Dinka og Nuer eru hálfhirðingjar sem
rækta nautgripi. Þeir fylgja úrkomumynstrum eftir árstíðum.
Þegar regntímabilið kemur að mýrlendinu Al-Sudd færa þeir sig
frá því svæði og yfir á annað svæði þar sem þeir geta notfært sér
beitarlandið sem hefur myndast vegna regnsins. Þegar savanna
beitarlandið hverfur smám saman á þurrkatímabilinu fylgir fólkið
ám og vötnum sem hafa minnkað og nýta nýja jarðveginn, sem
var eitt sinn stöðuvatn eða árfarvegur (South Sudan). Fleiri
þjóðflokkar eru Zande, Bari, Shilluk og Anywa. Shilluk eru bændur
og búa, ásamt Anywa, í austri. Bari búa í suðri og Zande í suðvestri.
Einnig búa Arabar í landinu en þeir eru í minnihluta
(Southern Sudan).
Suður-súdanska þjóðin er mjög ung, þar sem flestir íbúarnir eru
undir 29 ára aldri. Landið er tiltölulega strjálbýlt og flest fólkið er
að finna meðfram ánni Níl og þverám hennar. Stór hluti
þjóðarinnar býr í dreifbýli en búseta er þó bundin við vatnsföll
vegna vandamála vatnsveitu og þá sérstaklega yfir þurrustu
mánuðina (South Sudan). Algengasta tegund af húsnæði í dreifbýli
eru kringlóttir kofar sem kallast tukul. Þeir hafa keilulaga þak sem
gert er úr leir, grasi, hirsistilkum og trésúlum. Aðeins um
fimmtungur íbúanna býr í þéttbýli og meðal stærstu
borganna eru Wau, Malakal, Yei, Yambio, og höfuðborgin Juba
(Southern Sudan).
Áratuga löng borgarastyrjöld tók sinn toll af lífsgæðum og
velferð þjóðarinnar. Meðalævilengd í Suður-Súdan er
mun lægri en tíðkast annars staðar í heiminum og er lægri
en meðalævilengd í nágrannalöndunum. Meðalævilengd karla
í Suður-Súdan er 60 ár og meðalævilengd kvenna er 64 ár
(Sudan profile – Facts, 2015). Til samanburðar er meðalævilengd
karla á Íslandi 80 ár og meðalævilengd kvenna er 83 ár
(Dánartíðni og ævilengd 2013, 2014).
Þjóðflokkurinn Dinka
Tukul hús
Fæðingartíðnin í Suður-Súdan er 36 á hverja 1000 íbúa (Birth rate) og dánartíðnin er 12 á hverja 1000 íbúa (Death rate).
Fæðingartíðnin á Íslandi er 13 á hverja 1000 íbúa (Iceland Birth Rate) og dánartíðnin er 7 á hverja 1000 íbúa (Iceland Death Rate).